Saturday, November 21, 2009

وكيل الوزارة Gmail



اول امس كانت عندي معاملة
في وزارة الكهرباء و الماء العتيدة
فرع العارضية

طبعا ماني متكلم عن شكل المكان المغبر و الاثاث المتهالك
و لا عن المكاتب و الكاونترات الخالية من موظفينها
و لا عن النماذج اللي للحين يحطون لها اوراق كربون و يعبونها
و لا عن المعاملة اللي لفيت فيها مكتب مكتب
عشان اجمع كل تواقيع الموجودين و اختامهم
و كل شوي يقولون لي روح الكمبيوتر

و لا عن مسؤول الفنيين المصري اللي كان يعاني من حالة اكتئاب حادة
بسبب خسارة منتخبهم
و حمدت ربي اني كنت لابس تي شيرت احمر مو اخضر
و لما عطيته معاملتي و كنت محتاج اخذ فني معاي يقرا العداد
قالي بس وصله عند اي بقالة عشان يشتري لي سجاير


ماني متكلم عن كل هذا لان هذا روتين عادي
تعودنا عليه في بلدنا الحبيبة الكويت

لكن كله صوب و هالاعلان صوب
اللي ما قدرت اقاوم نفسي و صورته


الحين هذي اخرتها ؟؟

وكيل وزارة مساعد حاط ايميله في تعميم رسمي
Gmail ??!!

بس يعني متطور شوي
مو هوت ميل

****

انا اذكر من فترة بعيدة طلع لنا وزير مواصلات سابق
و رفع شعار ايميل لكل مواطن

يبا اذا علينا احنا المواطنين
ما نبي شي منكم
نعرف ندبر روحنا و نسوي لنا ايميلات

بس عطوا مسؤولينكم ايميلات رسمية
يكون لها دومين حكومي
مو جي ميل

والله فشله

بصراحه انا و ولدي قعدنا نضحك
من باب شر البلية ما يضحك

****

الله يذكرج بالخير يا سناء الخراز



تحياتي



16 comments:

  1. ووديت الفني البقالة لزوم الدخان؟

    ReplyDelete
  2. لول جي ميل؟؟؟؟؟؟؟؟؟؟؟؟؟؟؟؟؟

    فلينستون يقرب للوزير شكله؟؟

    ReplyDelete
  3. هذا بعد زين حاط ايميله
    احسن من ايميل رسمي وموقع الجهة مايشتغل بالمره

    واللي يبي الزقاير حده راهي يطرش الاوادم على كيفه
    :(

    ياحلوها سناء الخراز .. احب صوتها :)

    ReplyDelete
  4. أنا مره رحت أدفع فاتور’ الكهرباء بالسره قالي الموظف رد بيتكم و ييبلنا اخر قراءه للعداد !!! قلتله ليش انتو ما تاخذون القراءات؟ قالي ما ادري و اذا تبي تمشي شغلك انت روح بنفسك و اقرى عدادك

    ReplyDelete
  5. لوووووووووووووووووووول
    كل هذا وما تكلمت عيل لو متكلم الله يستر
    في ملاحظة غير الجي ميل ليش الورقة معفنه و مو معدلين الأرقام حتى لو بس 2 و ليش ورقة ملزوقة مو محترمينها
    و حاطينها بـ"فريم" و هاذي الكويت و صل على النبي
    اللهم صلي على سيدنا محمد

    ReplyDelete
  6. chandal/danchal

    اكييييد غصبن لي
    عيل شلون اخلص معاملتي ؟

    :)

    ReplyDelete
  7. k-alanzi

    والله الوزاره بكبرها من عصر الفلنستون مو بس الوزير
    ههههه

    ReplyDelete
  8. Fishah

    من ناحية الرهاة هم راهين
    المشكله هو كان مدخن من غير سجاير

    فعلا سناء الخراز صوت جميل
    الله يرحم ذيج الايام

    ReplyDelete
  9. Very Depressed

    ههههههه
    مادري ليش ذكرتني بعبدالحسين في اوبريت مداعبات قبل الزواج

    انا مره رحت ادفع فاتورة تلفون قالولي ما عندنا ورق في البرنتر
    روح ييب ورق

    ههههه

    ReplyDelete
  10. خاتون

    لو اتكلم ما اخلص
    بس انا قايل مابي اتحلطم وايد

    و سؤالج بصراحه صعب
    يبيله تفكير وايد
    هههههه

    Only in Kuwait
    :)

    ReplyDelete
  11. كان المفروض تلبس تي شيرت مكتوب عليه الجزائر و بس و الباقى خس

    ReplyDelete
  12. Very depressed

    ليش ناوي على عمري ؟؟

    ReplyDelete
  13. خلها على الله
    يعني اذا دزيت له ايميل بيجاوب ؟
    حتى بالجامعة المفروض عند كل استاذ ايميل تبع دومين الجامعة
    لا هذول كل واحد مسويلة ايميل عالهوتميل لا الياهو
    ويوزعة على البنات احنا ما يعطينا هههههه

    ReplyDelete
  14. نمووول لوووووووووووووووووووول

    الحمد لله بجامعتي كل شي على دومين الجامعة حتى ايميلي آنا كطالبة لول

    حلوة هذي يوزعه على البنات لوووووووووووووووول

    ReplyDelete
  15. نمووول

    هذي اي جامعه اللي فيها مدرسين جذي ؟؟!!

    لا بالله كدينا خير

    ReplyDelete
  16. صباح اللولو والمرجان
    توني اقرا البوست
    ادري متأخره


    اقولك شي؟
    الحين عرفت ليش اختي تضحك علي
    لأن ايميلي الرسمي على الهوت ميل:)


    شنسوي يعني :)

    ماكو دومين حق وزارة الصحه :)


    انا من زمان حاسه اني داثره


    الحين زاد الاحساس...:)

    ودّي

    ReplyDelete