Wednesday, December 23, 2009

Cinescape



اليوم راح اتحلطم شوي على شركة السينما الكويتية

اول موضوع هو تقسيم قاعات السينما
الى عزاب و عائلات
هالموضوع ما كان مضايقني في السابق
لان التقسيم ما كان فيه تفرقه كبيره بين العزاب و العائلات
لكن مؤخرا السالفة مصخت حيل

اول شي الغوا مقاعد العزاب تماما في سينما ليلي جاليري
و هي من السينمات المفضلة لدي بسبب مقاعدها المريحه و المسافات بين المقاعد
ثانيا قسموا سينما الايماكس الى عزاب و عائلات بحيث
قسم العزاب يكون النصف الامامي و العائلات النصف الخلفي
و طبعا من المعروف ان المقاعد الخلفيه هي الافضل في هذي السينما
خصوصا اذا كان الفيلم اكشن لان الشاشه كبيرة جدا

طيب انا شذنبي اذا زوجتي ما تحب تروح معاي بعض الافلام
اللي تختلف اذواقنا فيها عن بعض
خصوصا افلام الاكشن و الخيال العلمي
و عادة اخذ معاي الاولاد الكبار
طيب ليش انظلم و تنفرض علي اسوء المقاعد
يعني اب مع اولاده ليش ما تعتبرونهم عائله ؟؟
من وين اييبلكم مرا معانا عشان نصير عائلات ؟
تصدقون مرات اودي بنتي طيوبه معانا عشان تصير محرم
و طبعا كالعاده يا انها نايمة طول الفيلم هذا اذا كان حظنا زين
او انها تلعب و تراكض دار ما دار السينما
و كل شوي واحد من اخوانها لاحقها
و يسبون اليوم اللي دشوا فيه سينما معاها

***
طبعا انا دقيت علي الشركة و شرحت لهم هالموضوع
و كان هذا في تاريخ
5/11/2009
و وعدتني الموظفة انها توصل استفساري و طلبي للمسؤولين بالشركة
و انهم راح يتصلون فيني
و عقبها بدقايق وصلتني مسج ان تم تسجيل طلبي و عطوني رقمه

و سلامتكم لليوم محد دق
و مازال الوضع مثل ماهو

اتمنى اذا في احد يقدر يوصل هالكلام للمسؤولين بالشركة
لانه هالمشكلة انضافت لمشاكل ثانية تخليني اكره اروح سينما بالكويت

****

الموضوع الثاني الرقابة و التقطيع
انا ما اعارض مبدأ التقطيع لاني اخذ عيالي معاي
و احب اكون مطمن ان الفيلم مافيه مشاهد خليعه
ما تناسب سنهم
و خصوصا مع الغياب التام لموضوع الريتنج
او التصنيف على حسب السن و المحتوى
للافلام و المسلسلات سواء بالسينما او التلفزيون

لكن اذا الشركة شايفة ان الفيلم راح يتقطع منه وايد
و هذا ممكن يؤثر علي القصة و تسلسل الاحداث
ليش تعرضونه ؟؟
من البداية فكونا و لا تعرضونه !!
ليش تخلونا نروح و ندفع و بعدين ما نفهم شي

ولا انتوا شرايكم ؟؟

****
مزاجي اليوم
اهداء للصداقة



الحان اسطورة الجيتار ايريك كلابتون
و كلمات ستينج

When the world's gone crazy and it makes no sense
And there's only one voice that comes to your defense.
The jury's out and your eyes search the room
And one friendly face is all you need to see.
And if there's one guy, just one guy
Who'd lay down his life for you and die,
I hate to say it, I hate to say it, but it's probably me.


6 comments:

  1. انا على حد علمي

    ان احنا ما عندنا تقسيمات السينما هاي

    انا من زمان ما رحت سينما :)

    ReplyDelete
  2. اذا المسؤول عن السينما واحد اسمه لاجئ عاطفى شتوقع بيصير ؟

    ReplyDelete
  3. اقصوصه

    اي انتوا محظوظين
    احنا عندنا مشكلة
    يعني اذا حبيت ادخل فيلم اروح ابوظبي

    :))

    ReplyDelete
  4. very depressed

    من صجك هذا اسمه ؟؟
    اكيد انت تعرفت عليه في مستشفي الامراض النفسيه

    ReplyDelete
  5. I like every thing related to sting

    thanx for sharing !!!

    im sorry i didn't read your post cuz im sick !!

    see ya arround ^_^

    ReplyDelete
  6. k-alanzi

    i like sting and his songs.. great artist
    u r welcomed anytime dear

    salamaaaat o matshofen shar dear
    take care and get well soon

    ReplyDelete