Thursday, February 11, 2010

رحلتنا للخبر


بدأنا اول يوم لنا في الخبر
بالتسوق في مجمع الراشد
طبعا المجمع فيه الكثير من محلات الموبايلات و اكسسواراتها
و لاحظت انتشار الاكسسوارات النسائية للبلاك بيري
و هذا دليل علي انتشاره الواسع هناك

بالنسبة لي ما لقيت اللي ادور عليه
و هو بطارية لجهازي الماك بوك برو
لان اسعار اجهزة الماك هناك ارخص من اللي في الكويت

بالنسبة لعلي اشترى جيتار جديد من شركة الدولية هناك
Yamaha C80
بصراحة صوته حلو و سعره معقول
عبيد لقاله جيتار صغير و حن علي اشتريه
بس قتله لما تكبر شوي اخذه لك
و المشكله انه عسمواي يعني لازم يعكسونله الاوتار
ههههه

و اما الباقي فاشترينا ملابس و تي شيرتات
و طبعا لازم نشتري العاب حق طيوبه لانها ما كانت ويانا

عقب ما خلصنا من الراشد كانت الساعة تقريبا عشر بالليل
قلت حق العيال شرايكم نروح سينما ؟
قالوا وين ؟ قتلهم البحرين
:))
طبعا ما قالوا لا
اشوا جوازاتنا كانت بالسيارة و ما احتجنا نرد الفندق
توجهنا للجسر و ما كان فيه زحمة و عبرنا الجسر بسهولة
١٠:٣٠ احنا في سيتي سنتر البحرين
حجزنا فيلم
The Book of ELi
والله عجبني الفيلم نوعا ما
و عقب ما خلص الفيلم ردينا للجسر
و ما صارت الساعة ٣:٣٠ الفجر الا احنا في فندقنا بالخبر
:)

****
ثاني يوم سوينا شيك اوت من الفندق و رحنا الظهران مول
و طبعا هذا مجمع ضخم جدا من دور واحد لكنه طويييييييل
بدينا من اوله عقب اذان العصر و وصلنا قريب اخره عقب صلاة العشا
و هذا كان مرور سريع بدون ما ندخل اغلب المحلات

لقينا ستاند هناك اسمه فريشبيري
و يبيع روب مثلج مثل بنكبيري اللي بالافنيوز
لكن النكهات اللي عنده فراولة و بيري و شوكليت و فانيلا
و هم عنده توبنجز مشكلة
و سعر اكبر حجم ارخص من سعر اصغر حجم بالكويت
و ماكو عليه دور
:))
تعشينا و لعبت اليهال شوي
و علي العشر بالليل حركنا في اتجاه الكويت
و وصلنا البيت بحمد الله الساعه ٢:٣٠

****
الرحلة بصراحة كانت قصيرة و ما مدانا نروح اي مكان ثاني
كان ودي نطول اكثر بس ما عندي وقت لازم ارجع
لكنها كانت رحلة شوبنج حلوه
و سامحوني ما صورت الا صورتين
في محل الدولية


شكرا لكم تمنياتكم و تعليقاتكم
و اتمنى لكم دائما اوقات سعيده و مرحه

تحياتي


12 comments:

  1. الحمدالله على سلامتكم
    خوش رحله صغيرونه
    المهم انكم استمتعتوا فيها :)

    ReplyDelete
  2. الحمد لله عالسلامه

    ReplyDelete
  3. لو شنو ماراح ايي اليوم الي اسافر فيه بالسيارة
    :/

    ماحب اسوق سيارة كلش ، حتى اذا بطلع مع ربعي اخلي واحد منهم يمرني

    على العموم انا سعيد لانك استمتعت بوقتك مع اسرتك
    :*

    ReplyDelete
  4. الحمدلله على السلامه

    ReplyDelete
  5. حمد الله على السلامه
    امتع شيئ الرحلات العائليه القصيره
    الغير مخطط لهاااا ....ممتعه
    اهم شيئ انكم ما نسيتوا طيوووبه
    الله على قلب الاب...ابيض
    الله يخليك لهم ويحفظهم لك

    ReplyDelete
  6. Fishah

    الحمدلله كانت قصيره بس ممتعه
    الله يسلمج
    شكرا فشه

    ReplyDelete
  7. panadol

    الله يسلمك اخوي
    شكرا

    ReplyDelete
  8. Jako

    والله انا بعد امل من السياره وايد
    لكن في الرحلات القصيره للخليج احسها اريح من المطارات و دوختهم
    خصوصا مطارنا
    و طبعا هم اوفر
    جرب رحله للخفجي
    خوش مطعم بخاري هناك
    ههههه

    تحياتي جاكو

    ReplyDelete
  9. NewRise

    الله يسلمج
    شكرا

    ReplyDelete
  10. بنت الشامية

    تسلمين يا بنت الشاميه على دعواتج الرقيقة
    فعلا رحله قصيره و متعبه بس كانت ممتعه
    ان شالله دايما ايامكم سعاده و فرح

    ReplyDelete
  11. ماشاءالله خوش برنامج الحمدلله على سلامتكم

    الموفي اهو نفسه لدنزيل واشنطن؟

    ReplyDelete
  12. Engineer A

    الله يسلمج مهندستنا
    اي نعم نفسه حق دينزل واشنطن
    و راح تكون لي وقفه معاه في بوست قادم ان شالله

    ReplyDelete