Sunday, September 6, 2009

حرب الاتصالات


لاحظت في الفترة الاخيرة ان حرب شركات الاتصالات
و بالاخص بين فيفا و زين انتقلت لساحة جديدة
هذه الساحة هي الانترنت و بالاخص المدونات و المنتديات
و طبعا هذا مو شي جديد لكن الظاهرة هذي تزيد
مع قرب الاعلان عن خدمات جديدة منافسة
و اكبر مثال علي ذلك مؤخرا
اعلان خدمة الانترنت من فيفا و زين
بسرعة 21.6
و مادري اذا لاحظتوا معاي ان الشركتين لجأوا
لتوزيع اجهزتهم مع الخدمة على بعض المدونين
لتجربتها و كتابة رأيهم فيها
و طبعا لا أتوقع الا المديح من اول تجربة لانه لا يوجد ضغط على الشبكة
و النظام شغال من احلي مايكون بدون مشتركين
لكن ماذا سيحصل عند زيادة عدد المشتركين ؟؟
و زيادة الضغط على الشبكة و على نظام التشغيل ؟؟

وكلامي الان موجه لزين لاني جربتهم

هل ستبدأ الاعذار بان هناك ضغط على الشبكة ؟
و ان نظام الوايرلس عبارة عن مشاركة بين المستخدمين
و بالتالي لن تحصل علي السرعة القصوى
و ان هناك تحديث للنظام و كلها يومين و تتحسن السرعة
حافظين كل اعذاركم لانها مرت علينا وايد
و تصفى في الاخر على يومين سرعة عالية
و باقي الشهر سرعة ديال اب
يعني اللي عنده كرت بو ٥ دنانير احسن منك

انا شخصيا اعتبر لجوء هذه الشركات لهذا الاسلوب
هو محاولة رخيصة للدعاية و كسب العملاء

هذي الشركات تصرف الملايين علي الدعايات
ما خلو شي حتى اناشيد رمضان دخلوا فيها
و انا خايف باجر في الاستراحة
بين ركعات صلاة القيام في المسجد الكبير
يقوم الامام الفذ ذو الصوت الجميل و يخطب فينا عن مزايا شركة زين
و يختمها ب ههه ههه ههها

اللي ابي اقوله للشركات هذي
هناك دعاية فعالة و قوية لكسب اي عميل
دعاية فعالة جدا لتحسين سمعة اي شركة
و تضمن لكم ولاء اي عميل

اسم هذه الدعاية هو

تحسين الخدمة و احترام العميل

صدقوني مافي دعاية
اكثر فاعلية من هالدعاية
و يمكن اقل تكلفة

والله عيب عليكم
شركة ارباحها مئات الملايين من الدنانير مو الدولارات
اذا تكلمت اكثر من ٥ دقايق يفصل معاك الخط مرتين
شركة الدعم الفني فيها يتصلون فيك عقب ٣ ايام
و في الاخر ما تحصل نتيجة منهم
شركة اللي يردون عليك في بدالتهم يستخدمون اسلوب اللف و الدوران
دون ان يحلون مشكلتك و بعدين يشكرونك علي اتصالك

انا اقول حسنو خدماتكم و احترمو عملائكم
و انا بنفسي اسويلكم دعاية ببلاش

لكني حاليا و بعد تجربتي المريرة معاكم
اقول لا ثقة فيكم بعد اليوم

ملاحظة للامانة

انا لم اجرب خدمات فيفا و بالتالي
لا استطيع الحكم علي خدماتهم
لكني ما زلت ضد اسلوب التمويه
في الدعايات



22 comments:

  1. من تجربة شخصية

    أول ما أشتركت بالنت كان إشتراكي بالوطنية وطبعا كان أقصى طموحي أنه يشبك (تخيل) وطبعا خل عنك
    السرعة

    فقررت أقطعه وأروح زين
    السرعة لك عليها لكن على الأقل يشبك في أي وقت مو مثل W-net
    وطبعا مثل ما اتفضلت كل ما أدق يقولون ضغط أو نعمل على تحديث الشبكة

    وعندهم حركة بوق أشكره
    إشتراكي 30دك بالشهر ولي الحق أنزل 30 جيجا أي بمعدل 1جيجا باليوم

    ومع هذا بس أوصل 11 أو 13 جيجا يحطون بلوك على السرعة الي أساسا بطيئة ولمن أدق يقولون أنت طفت ال30 جيجا؟؟؟
    أقولهم عندي بالقطعة يبين جم منزل وأذكرلهم الرقم بالضبط يقولون لي خلاص قبلنا شكوتك توقع إتصال خلال 24 ساعة

    وطبعا هالقصة انعادت 3 مرات معاي وأبي أقطع تعاملي معاهم بس الوطنية أخيس منهم وفيفا ما أشوف أحد يمدحهم

    باختصار...إذا صارت حاجتك عند الهوهو قوله مياو

    وآسف على الإطالة بس من القهر الي فيني

    ReplyDelete
  2. بالنسبة للقهر من زين عندنا و عندك خير
    ما شفت شركة اسوأ منها في التعامل
    شهرين ادق عليهم بمعدل يومي و اقولهم السرعه بطيذه عندي و ما يسوون شي
    و لما رحت قابلت مسؤول الشكاوي عندهم
    مع انها صعبه جني أبي اقابل وزير.. جربها
    دزلي واحد البيت و طلع قعلا البرج خربان و صلحوه
    قتلهم من يعوضني عن الشهرين
    قالو مافي تعويض

    يقولون فيفا مافيها ليميت للداونلود
    اذا صج حول و انت غير مأسوف علي زين

    ReplyDelete
  3. أنا استخدم الايقو وتيله عرات يوم يومين يصير بطيء
    ادق عليهم يقولي يمج الجهاز والايقو ؟
    اقول اي
    يقول: شيلي الايقو
    نطري 5 دقايق
    وحطيه بالفتحه الثانية
    ويشتغل
    قلت هذا سحر ؟ قال لا أختي بس ضغط على الشبكه
    شقوله يعني ؟
    ودي أسب هههههه
    شكرا ومع السلامه

    للأسف النت عندنا غالي والسرعة بطيئة وان كانت أعلى

    ReplyDelete
  4. حياتي هدف مو عبث

    طبعا اكثر ردودهم ماهي منطقية
    و انا مرات كنت ادق علىهم باليوم مرتين و كل يوم
    لما مليت و زهقت و قطعت اشتراكي معاهم
    و خسرت كل القطع اللي شاريهم منهم
    لاني هم شاريهم بفلوسي و هم قافلينهم و ما نقدر نستفيد منهم

    و مسألة السعر
    احنا رضينا بالسعر اللي طلبوه و دفعناه
    بس في المقابل وين الخدمة و السرعة اللي وعدونا فيها؟؟

    ReplyDelete
  5. انا عندي الايجو
    وطبعا كله يفصل وينجلني
    فا اكمل واشبك على اشتراكنا مال الشوتايم

    وتعودت ادفع شهري عن طريق السايت مالهم
    والحين لاحظت انه الصفحه اللي تبين لي جم دفعت بالتواريخ شايلينها بكبرها
    حق البوووووق العدل!

    الكونيشكن مال فيفا يمدحونه يمكن احول لهم :)

    ReplyDelete
  6. I called Zain today and they said that their speed is 14.4 but they are working on upgrading it before the end of this month to 21.6!

    ReplyDelete
  7. كلامك عدل دكتور..

    والمشكله كل مانروح حق شركه نلقاها اسوء من الثانية شغلهم بس حجي وتدري الحجي ابلاش :)
    انا عن نفسي افضل زين عن الوطنيه

    ReplyDelete
  8. Fishah

    دايما سألي احد في منطقتكم اذا يستعمل اي خدمه
    لانها تفرق من مكان لمكان

    و شوفي عروض فيفا
    يقولون القطعه ببلاش و مافي ليميت للداونلود
    تأكدي منهم

    الله المستعان

    ReplyDelete
  9. ansam

    mmmm so what about all those bloggers who r writing reviews of the new 21.6 speed ??!!
    thats cheating.

    ReplyDelete
  10. allamba almur3ba

    انا اللي اشوفه ان ماكو شركة اسوأ من زين
    هذي عن تجربتي معاهم
    و الدليل انا استخدمت الايجو
    و كنت ادق بالاسبوع عليهم ٣- ٤ مرات
    و ساعات كل يوم
    و الحين استخدم نت الوطنيه
    و ليومج ما احتجت ادق عليهم

    ReplyDelete
  11. 3Lo0oSh

    يعطيكم العافيه جميعا....

    مثل ما قلتو انه في تنافس بين الشركات و خاصه الفيفا و زين

    و العروض بينهم قويه جدا معنى عروض الفيفا تجذب العميل انه يشترك و عروض شركت زين تنحش العميل

    و انا شخضيا كنت اشتغل بشركة المستقبل و كنا موزعين شركة فيفا و عروض الفيفا قوية جدا معنها شركة يديده
    و زين العكس تماما صارلها سنين بالكويت و تقدر تصير من احسن الشركات بالعالم

    لكن شركة زين في الكويت مو مهتميين لها كثر الدول الثانيه مثلا زين في البحرين الايقو عندهم ابلاش و عليك بس الاشتراك و في الكويت اول مانزلت الايقو كانت فوق ال50 دينار و لا سرعه و لا خدمه و حتى خدمى العملاء 107 مثل ما قلتو اعذار مو منطقيه و الدعم الفنس ما يحل لك المشكله و تضطر تنطر 3-4 ايام عشان يردون عليك

    ReplyDelete
  12. 3looosh

    من الطبيعي ان الشركة اللي تدخل في سوق جديد دائما تبدأ بعروض مغرية جدا
    عشان تكسب زباين جدد
    و كنا نتوقع من زين ان تنافس فيفا و تسبقها في العروض حتى تحافظ على مكانتها
    لكن اللي حصل ان زين ركضت لوزارة المواصلات تطلب منهم ترجيع الرسوم علي الخطوط الارضيه
    و هذا شيء مؤسف جدا
    و غيره و غيره من الامثله
    ما نخلص
    الله كريم

    ReplyDelete
  13. 3Lo0oSh

    اي انا عارف هالشي بس شركة زين تقدر تسوي عروض احسن و اقوى من الفيفا عشان تتمسك بعملائها بس للآسف الي قاعدين نشوفه العكس تماما الفيفا,,,شركة زين مالها اي عذر شركة كبيرة و خيرها واايد و تقدر تصير احسن شركة بالكويت,,,لكن الاهتمام لدول الاخرى مثلا شركة زين سوت خدمة التجوال الي تتكلم مكالمة محليه بدول الي مشتركه فيها و سوت هالخدمه لكل الدول الي فيها زين الا الكويت,,,و معنى شركة زين شركة كويتية و المفروض الأولوية للكويت

    يعطيكم العافيه

    و زين تشكر اتصالك :)

    ReplyDelete
  14. 3looosh

    ماعتقد زين راح تبقى كويتيه
    شكلهم راح يبيعونها

    ReplyDelete
  15. التنافس بين الشركات صار لربح أكثر
    وإستغفال مشتركين أكثر
    وليس لتنافس وتقديم خدمات أفضل
    وهذي المشكلة ممتدة حتى مع الخدمات الأخبارية على الموبايل أو الترفيه
    يقولون إشترك وبس بدون تفاصيل عن التكاليف وتجديد الإشتراكات
    الله يكافينا شر جشع التجار

    ReplyDelete
  16. اي لاحظت جم مدونه عارضه آخر التطورات والمستجدات في شركه زين مع بانر دعايه فلاش يعني السالفه اشكره بفلوس

    انا استخدم فيفا انترنت وحاله حال الدايل اب
    مرات اسوي تست حق البرودباند مايوصل حتى سرعة الدايل أب

    يعني ادفع 24 شهريا على ولا شي

    هم عندي خط فيفا ودايم السيرفس نازل عندي

    على قولتك دعايات بالملايين وموراضين يحسنون خدماتهم

    ReplyDelete
  17. Nikon 8

    انا من بداية رمضان و انا اتصل فيهم اطلب منهم يقطعون عني هالمسجات
    اقولهم الجنه اللي من تيي منكم مابيها
    و عقب ٣ مرات و مع الزف اقطعوها غصب

    و بالنسبه للتجار عندنا
    ما راح يعدلون خدمتهم او يخفضون اسعارهم
    دام مو لاقين شعب واعي يقاطعهم

    ReplyDelete
  18. Chaotic posha

    اي والله رضينا بالهم و الهم مو راضي فينا
    امنا بالله و قلنا ندفع ٢٤ لكن نبي خدمه اللي توعدونا فيها

    حسبي الله و نعم الوكيل

    ReplyDelete
  19. للاسف تنافسهم في استغفالنا والنصب علينا
    الفواتير شي خيالي والخدمات بالماينس
    حسبي الله ونعم الوكيل فيهم

    ReplyDelete
  20. Mamloo7a Q8ia

    اي والله صدقتي
    الجشع ماله حدود
    حسبي الله علي كل من يستغل الناس
    و يعتبر استغفال الناس ذكاء و شطاره

    ReplyDelete
  21. صح لسانك بوعلي يالله يايتهم الشركة الإماراتية الحين

    ReplyDelete
  22. jeemaz

    الله يحط حيلهم بينهم بوصقر
    لكن لا بد من المقاطعه

    ReplyDelete