Wednesday, September 16, 2009

I'm Back




عدت لكم بعد انقطاع قصير
كان سببه رحلة قصيرة للبحرين و الخبر

اخذت الاولاد و حركنا بالسيارة يوم الجمعة بعد صلاة العشاء
قعدنا في البحرين ليوم الاحد
و بالليل حركنا للخبر و بتنا فيها ليلتين
تسوقنا في مجمع الراشد و ظهران مول
و طلعنا امس من الخبر الساعة ٣ العصر
و وصلنا الخفجي قبل اذان المغرب
تفطرنا و صلينا في الخفجي
و بعدين رحنا تعشينا في مطعم البخاري الجديد بالخفجي
و عقبها ردينا الكويت

*****
احب البحرين بلد الحلوى و ماي اللقاح
احس فيها بطمأنينة
احس هناك بالبساطة و الطيبة
و النظام و احترام الناس لبعضها
و تحس ان كل واحد بحاله
و البحرين احسها قاعده تتقدم و تتطور
وببطئ و ركاده عكس الطفره السريعه اللي صارت في دبي

*****
و حبيت مدينة الخبر
مجمعاتها حلوة و كبيرة
و كورنيشها جميل بس يبيله يتعدل الجو شوي
و اسعارها رخيصة نوعا ما

*****

واضطريت اني ابدل تواير السيارة بالخبر
لاني لاحظت وجود تشققات في التواير الامامية
و انا وراي طريق سفر مو وقته اهملهم

*****

لقيت لابتوب ابل الجديد
Macbook Pro 13 inch
اعلي مواصفات تقريبا ب ٥٢٠ دينار
قالولي انه ينباع بالكويت ب ٦٠٠ دينار
بس انا مو متأكد
لكن اذا هالكلام صحيح
سؤالي ليييييش؟
مع العلم اني شاري لابتوبي هذا اللي اكتب فيه الحين هم ابل
من الخبر و كان ارخص من الكويت ب ١٢٠ دينار

*****

هذا ملخص رحلتي القصيرة و بعض الخواطر حبيت اشارككم فيها
و ان شالله نلتقي في بوست قادم باذن الله تعالى


تحياتي للجميع



16 comments:

  1. الحمدلله على سلامتك وسلامة الأهل, أمس حركت من البحرين الساعة الواحدة والنصف ووصلت الحدود الساعة الخامسة .. يبدو أني سبقتك بساعة زمن
    :)

    زين سويت إنك أخذت الجولة قبل العيد, لأن بعد العيد سوف تنفجر البحرين من الزحمة والجسر يتوقف من تكدس السيارات .. اما على طاري الماك, اغلب ربعي اللي شارين ماك. شارينه من السعودية. أرخص من الكويت بكثير

    اموفق
    :)

    ReplyDelete
  2. الحمدلله على السلامة

    أنا رحت البحرين مرة وحده قعدت فيها 3 أيام حبيت الفندق أكثر من شوارعها

    Sorry إذا في أحد من البحرين قاعد يقرأ هذا رأي مو أكثر

    ReplyDelete
  3. الحمدلله على سلامتك وسلامة الأهل
    وإن شاء الله استمتعوا

    كل شي بالكويت سعرة زايد
    أطلبه من أي موقع أفضل

    وهم أنا أحب البحرين وأهل البحرين
    فيهم طيبة وكلامهم يونس
    :)

    ReplyDelete
  4. الحمدلله على سلامتك ..

    وإن شاءالله كانت رحله سعيدة

    في ربوع البحرين .. وبلدنا ..

    ومثل ماقلت الكورنيش والواجهة البحرية ..

    أحلى بكثير بجو أحلى ..

    ....

    أما عن الأسعار ..

    ما كنت أتوقع أن أسعارنا أقل من أسعاركم ..

    كنت أظن أن أسعار الكويت أرخص ..

    مع أني مازرت الكويت

    :)

    تحياتي ..

    ReplyDelete
  5. مساك الله بالخير دكتورنا والحمدلله على سلامتك وسلامة العايله الكريمة , شي جميل ان الواحد يكسر روتين ايامه برحلة بالسيارة
    عليكم بالعافية
    انا من عشاق البحرين كل ما حسيت بحنين لطيبة اهل الكويت اول وتراحمهم وبساطتهم قبل ما اتغير الفلوس والمصالح انفوسهم زرت البحرين لان احسهم مازالوا محافظين على هويتهم مو احنا الى ضيعينا مشيتنا ولا
    ، عرفنا انقلد مشية غيرنا صح
    من المواقف الي صارت لي واتذكرني بالكويت ايام اول ان في احدى زياراتنا للبحرين واحنا انتمشى بسكيك سوق باب البحرين ما اشوف الا الناس صفوا على ناصيتن الشارع الرئيسي للسوق واهم يتخابرون الشيخ ببمر الشيخ بيمر ، وصيفينا وراهم انتطمش انا واخوي وخواتي نبي انشوف شنو راح ايسوون والا الجماعة يرفعون ايديهم بالهوا يسلمون والشيخ عيسي الله يرحمه يرد عليهم بالسلام وهذا بالضبط الي كان يصيير على زمن الشيخ عبدالله السالم حسب ما اوصفوولي اخواني وخواتي بصراحة اخنقتنى العبره لما شفت المنظر
    الله يحفظ ديرتنا ويحفظ البحرين ويديم المحبة بينا وبينهم وبين ابناء الخليج كافة
    سامحني طولتها عليك....
    :)

    ReplyDelete
  6. -mate

    الله يسلمك اخوي و حمدلله على سلامتك انت بعد
    انا لاحظت لاول مره ان البحرين فاضيه هالايام
    لكن الله يعين اهلها في عطلة العيد
    مادري شلون البحرين تشيل كل هالناس اللي يدشون من الجسر
    انا دايما اتفادى زحمة الجسر في العطل

    اما بالنسبه للماك فعلا انا ملاحظ الاسعار ارخص في السعوديه
    مادري ليش ؟؟!!

    ReplyDelete
  7. jako

    عادي في ناس ما يرتاحون لما يروحون البحرين
    كل واحد و له ذوقه في السفر
    هذا شي نسبي
    يعتمد علي شنو نحب و شنو نكره
    و في كل مكان له ايجابيات و سلبيات

    ReplyDelete
  8. حياتي هدف مو عبث

    الله يسلمج و يخليج

    مو بس الاسعار
    انا حتى ملاحظ التنويع بالبضاعه
    عندهم اشياء مو موجوده عندنا
    مادري ليش تجارنا يخافون ينزلون كل شي

    ReplyDelete
  9. pen seldom

    الله يسلمج اختي

    اي والله استمتعت
    الحلو في مثل هالسفرات انه الواحد يغير جو و يكسر الروتين
    لكن يحس انه بين اهله في دول الخليج و مايحس باي غربه و الحمدلله

    بالنسبه للاسعار مو كل شي ارخص
    لكن انا ملاحظ اجهزة الماك بالذات ارخص في السعوديه
    لكن ماقدر اعمم هالقاعده علي كل شي

    و ان شالله تشرفينا و تزورين بلدج الكويت و ان شالله تعجبج
    حياج الله

    ReplyDelete
  10. Engineraa

    هلا و غلا بمهندستنا العزيزه
    الله يسلمج تسلمين
    اي والله كسر الروتين حلو
    و مثل ما قلتي فعلا اهل البحرين فيهم طيبه و بساطه
    و ما خربتهم الفلوس

    و الشيخ عيسى الله يرحمه كان معروف ببساطته و تواضعه

    و الله يسمع منج و يديم المحبه بينا
    و ان شالله نشوف اليوم اللي تتوحد فيه عملتنا و جوازاتنا
    مو نقعد نتهاوش على كره

    و بالعكس كلامج ممتع و اتمنى دايما تطولين
    :))

    ReplyDelete
  11. الحمدالله عالسلاامه

    البحرين صح حلوه حق 3 ايام بس مو اكثر
    واهلها اهبلووووون بمعنى الكلمه
    بعض المرات خاطري اروحلها بس ياربي اهلها من كثر ما اهم طيبون ويوجبون مايخلونك تاخذ راحتك من العزايم
    صح ما ينعرفلنه
    =p

    ReplyDelete
  12. صبحك الله بالخير دكتورنا ،،، اشكرك عل الاطراء الرقيق
    بس تذكرت شغله مميزه عند اهل البحرين وهو لفظ مازالوا محافظين عليه يستخدمونه من باب التقدير والاحترام " يا الشيخ او يا الشيخه" واحنا نستخدم نفس اللفظ بطريقة التشجيع "عفيه على الشيخه" بس حاليا قل او ندر استخدامه انا اذكرالوالد الله يرحمه ويدي ويدتي يستخدمونه معانا وايد. والله اهلنا اول صج تعليمهم بسيط لكن بنوا شخصيات بتربية تعتمد على التشجيع والسمو باللفظ والترفع عن صغائر الامور عكس اعيال هالوقت كل ما صغر سنه طال إلسانه وتطاوله على الاوادم
    الله يصلحهم

    ReplyDelete
  13. violeta

    حياج الله اختي و الله يسلمج

    بالنسبه لي ماعندي مانع اقعد فيها اكثر من ٣ ايام
    انا من النوع اللي يحب الاسترخاء في السفر و ماحب اللويه
    و مثل ما قلتي اهلها طيبين و كرماء
    وانا عندي اهل هناك و اعرف سالفه العزايم اللي ماتخلص
    ههههه

    تحياتي لج

    ReplyDelete
  14. Engineraa

    مساج الله بالنور اختي المهندسه
    العفو اختي ماكان اطراء :)
    هذي من الكلمات اللي تعجبني عندهم و تحسسني بالاحترام و اللباقه بالكلام
    انا مره رحت وزارة التربيه عندهم عشان معامله
    و طلعتلي مراقب التعليم هناك
    و كل كلمه و الثانيه تقوللي يا لشيخ وقع هني
    و يالشيخ الحين روح المكتب الثاني
    انا استانست من المعامله الراقيه
    و تذكرت لو عندي نفس المعامله في الكويت شنو راح يكون اسلوب الموظفات و الموظفين عندنا معاي
    هههههه
    و انا على فكري خوالي بحرينيين
    و العرج يحن مثل مايقولون
    :))
    تحياتي

    ReplyDelete
  15. مساج الله بالخير دكتورنا ،،، والله والنعم فيك وفي اخوالك
    وحجوتك ذكرتنى بأغنية قديمة مو مذكرتها عدل من كلماتها"هذا بني عم وهذا بني خال " بس اهيا اتبين ان صج الخليج كلهم اهل وبيت واحد.

    ReplyDelete
  16. Engineraa

    الله ينعم بحالج ما عليج زود
    فعلا كلنا اهل و عاداتنا وحده

    تحياتي لج مهندستنا العزيزه

    ReplyDelete