Sunday, September 27, 2009

Zain Nonsense Again !!!




ادري موضوع التحلطم على شركة زين موضوع مكرر
و الكل تكلم فيه لكن الواحد ما يقدر يسكت من اللي نشوفه
****
اتصل فيني صديقي وليد و قالي عندي سالفة لك عن زين
قلتله خير اللهم اجعله خير
قالي سرعة الايجو عنده صارت وااااايد بطيئة
اللي حتى صفحة ياهو ما تفتح الا عقب 10 دقايق
طبعا المسكين اتصل في 107
و ما ادراكم ما 107
رد عليه واحد و قاله اي نعم اخوي احنا مبطئين عليك السرعة
لانك تعديت الليميت اللي هو 20 جيجا
!!!!
طبعا الاخ العزيز وليد الله يحفظه و يخليه حق عياله و يحميه من قهر فعايل زين انصدم
و كان رده كالتالي

الحين لما اشتركنا بالايجو اول ما نزلت قلتو في اعلانكم
اشتراك غير محدود ب 30 دينار شهريا
و تفاجئنا عقبها بفترة بسيطة انكم حطيتو لميت 30 جيجا
و امنا بالله و قبلنا غصب علينا
و قلتو اللي يتعدى ال 30 جيجا راح نقلل سرعته
لكن كان الملاحظ ان السرعه مو بس تقل
الا تنقمت تصير ميييح سلحفاة
و الحين مني و الطريق تسوون الليمت 20 جيجا
بدون اي اعلان او تنبيه للمشتركين
يمكن انا ما اقبل اجدد معاكم مع هالتغيير
قاله الموظف بس اخوي احنا زدنا السرعة و سويناها
21.6
هني انا علقت و قلت حق وليد
يعني عطوك سيارة لامبرغيني و قالولك حدك داخل الفريج

يعني ابي افهم وين احترام العميل ؟
ليش ما تكونون واضحين مع العميل
شركة من اكبر الشركات في الكويت و هذي سوالفكم
مو عيب ؟ شغلكم لف و دوران و ما ابالغ اذا قلت نصب و احتيال
والله عيييب عييب عييب

****
اما سالفتي انا معاهم
من بدا رمضان و هلت علي مسجات الدعايات
تبي تسمع قران ارسل
تبي تسمع اناشيد ارسل
تبي ترسل دعاء ارسل و اشترك
و ما يدزون الا حزة غفوتي الوحيدة عقب صلاة العصر
دقيت اول مره علي 107 و قالولي خلال 24 ساعة تنقطع المسجات
و ما صار شي
دقيت ثاني مره و ما صار شي
و دقيت ثالث مرة و طلبت المسوؤل و قتلهم عيب احترمو عملائكم و رغباتهم
و الجنة اللي من وراكم مابيها
شوي استحو على دمهم و وقفوا هالمسجات
لكن مادري منو قالهم انا قصدي بس رمضان
من بدا العيد ردت اشتغلت علي هالمسجات
لا حول و لا قوة الا بالله
حسبي الله و نعم الوكيل
و اتمنى احد يوصل هالكلام لهم
****
و عندي سالفة صج قديمة بس لازم اقولها عشان تعرفون لاي مستوى
وصلت له هالشركة
مرة وصلتني مسج منهم دعاية لخدمة جات عندهم
نص المسج بالحرف الواحد

ادخل على خدمة الجات
و تعرف على اصدقاء جدد
مثال
بحث 19 انثى عراق

لا تعليق
****
ودي اعرف على شنو حظي ؟؟
طبعا على الملايين اللي دشت بجيبكم
و انشفطت من جيوبنا
و مقابل ولا شي

****
سامحوني على الاطالة و على هالموضوع الغثيث
بس الواحد مرات ما يقدر يسكت

تحياتي

**********************
تحديث للموضوع

اتمنى اذا في احد يوصل كلامنا لاي شخص مسؤول من زين
اتمنى ان تقرون ردود اخواني و اخواتي و تعليقاتهم
و تشوفون معاناة عملاء زين مع هذه الشركه
مع اني اشك ان فيه مسؤول واحد يهتم بسمعة هذي الشركه
و يهتم بعملاء الشركه
لاني اتوقع وايد شكاوي توصل لهم
لكن ما يسوون لها شي
و السبب بكل بساطه
شبعانين


22 comments:

  1. (((

    ادخل على خدمة الجات
    و تعرف على اصدقاء جدد
    مثال
    بحث 19 انثى عراق

    )))


    ههههههههههههههههههههه ما يبطلون شركات الاتصالات لو تنطبق السما على الأرض يظل اسلوبهم واحد اهني واهناك

    آنا بالسعوديةما استخدم زين، رفيجاتي كثير يستخدمونها ويعانون نفس معاناتك، لكن سؤالي عندنا بالسعودية عروضهم كثيرة، يعني على كل عشرة يزيدونك رصيد عشرة وآخر الاسبوع يردولك دبل رصيدك اللي صرفته طول الاسبوع

    عندكم هالشي بالكويت؟


    بس صراحة المسج فللللللللللتة ههههههههههههههههه

    ReplyDelete
  2. يعني عطوك سيارة لامبرغيني و قالولك حدك داخل الفريج
    LOOOOOOOOOOOOOOOOOOOOOOL
    walah nfs elshay bel b7rain... wer suscribed to Batelco with 20 G limit 3shn its the best 1..
    yaz3m the speed 2... uffff ay 2!!! i swear nothing!! o etha we reached the limit.. nerj3 le39r el-dail up !!

    n u keep on paying coz every other company is the same !!

    ReplyDelete
  3. صاج والله بس همن الغلط منا نشوف خدمه الشركة ولا شي ونرد ناخذ منهم ادري ان بس 3 شركات وكلهم اردي من بعض بس انا شايفة هالشغلة في معظم الخدمات والمنتجات
    تدش محل او شركة جنك طرار مو عميل

    ReplyDelete
  4. مساءك سكر

    والله انك صاج!
    انا أعاني من الــ إي جو وايد صاير بطيء!
    ولاحظت انه صار بطيء من زادو السرعه !!!!
    ماني فاهمه العلاقه العكسية بالموضوع!!!!

    والله لدرجه انه مرات الصفحه اتعلق!
    ومادري!!! ابطل نت واصك خطي ! يذلون العميل ذل...
    يخلونك غصب تكرهم.....


    قواك الله


    ودّي

    ReplyDelete
  5. قصص الأتصالات ماتخلص ..

    وكل المشاكل والأزعاج يجي من وراهم , أنا ما أستخدم زين والحمد لله .. لازلت على

    stc

    وأن كانت مو مملوحة .. بس أفضل عندي من زين ..

    والعيب نفسه من ناحية الرسائل ..

    يااااااهم جايبين لي المرض , يعني الساعه 3 او 4 يرسلون لي رسالة

    تبرع لمرضى الكلى بالدم !!!


    يعني هذا وقت يرسلون فيه مثل هالرسايل ,

    ومره أمي مسكينه تقول جاتني رساله وانا نايمه الساعه 3 مكتوب فيها

    لاتحزن لموت عزيز على قلبك وما ادري شنو

    طبعاً أمي خافت وما كملت الرسالة

    شافت طاري الموت واتصلت على اخواني كلهم خافت ان فيهم شيء .. وفي النهاية اكتشفت ان تكملة الرسالة

    انتبة لحوادث السيارات وخفف السرعه !!!!!

    قهررر


    والا جات فترة النت صاير زفت ,, كل يوم والثاني

    مقطوع النت على جميع الحي , شصاير يا ناس .؟

    شركة الأتصالات قاطعته عندهم مشاكل .. !!

    مشاكلهم ماتتصلح لمدة 3 او 4 أياام .. ؟ شدعوة يعني


    k-alanzi اما عن كلام الأخت

    ترى لا يقرك أنهم يعني مسوين عروض على الفاضي , لازم في النهاية يطلعون أهم المستفيدين ..

    أسمع ربعي اللي عندهم شريحة زين يقولون أنهم إذا اتصلوا على وحده من البنات وماردت وسكرت يخصمون عليها مبلغ معين .. مع أنها ما ردت


    ( أول ما صارت شركة زين عندنا بالسعودية سألوهم ليش دفعتوا مبلغ ضخم جداً عشان تكونون في السعودية ؟

    قالوا : لأن أحنا نقدر نرجع المبلغ كامل في وقت الحـج بس ومن رسايل العيد فيه



    .....

    عذراً للأطالة

    :)

    ReplyDelete
  6. k-alanzi

    هلا فيج اختي نورتي المدونه
    والله العروض اللي تقولين عنها نسمع عنها في السعوديه و البحرين
    لكن في الكويت لا
    و اذا سوو عرض دايما تكون فيه صيده
    مثلا الرصيد المجاني له ليميت يومين
    و يكون بس حق مكالمات من زين لزين
    و لازم تتكلم و انت منسدح مو واقف
    و حاطين امية شرط عشان الواحد يستفيد من العرض

    ام عن مسج التعارف
    اي الشباب ناقصين خراب بعد

    تحياتي

    ReplyDelete
  7. nosa

    wallah chan zen nerja3 leser3at el dial-up.. ella dial-up abrak.
    bs 3endina mafeeh shareka aswa2 min zain.
    zain 3endkum fil bahrain ba3ad wayed a7san min elkuwait

    sharaftay :)

    ReplyDelete
  8. Sweet Revenge

    كلامج صحيح
    لكن والله احنا سوينا اللي علينا
    اشتكينا و قدمنا شكاوي مكتوبه و قابلنا مسؤولين
    و لكن لا حياة لمن تنادي
    و انا و صديقي اللي تكلمت عنه الغينا اشتراكاتنا في زين بعد معاناة طويله معاهم
    و اللي كان حادنا نصبر الاجهزة اللي شاريينها منهم
    اثنينا شرينا قطعة الايجو ب ٦٥ و الراوتر ب ١٠٠ دينار و مقفولين على زين
    مو حرام.. منو يعوضنها

    حسبي الله و نعم الوكيل

    شرفني مرورج الاول اختي

    تحياتي

    ReplyDelete
  9. سلة ميوه

    مساءج فواكه و عسل اختي
    و نورتي بمرورج الاول

    انا ملاحظ الوطنيه خدمتهم احسن
    صحيح ما عندهم سرعات عاليه
    بس سرعتهم معقوله و ثابته و مافيه ليميت
    و لو تتصلين بالدعم الفني يتصلون عليج عقب ٥ دقايق مو ٣ ايام نفس زين
    و ما احتجت اتصل فيهم الا مره وحده من ٦ اشهر

    قاطعو زين و عالمهم القبيح

    ReplyDelete
  10. ..pen seldom

    منوره اختي
    و طولي مثل ما تبين.. مشاركتج اثرت الموضوع
    فعلا مافيه اسوأ من شركة زين بالخدمات و بعدم احترام العميل
    انا عندي خط زين و خط الوطنيه
    ما توصلني مسجات الدعايات على الوطنيه مثل ما توصلني من زين
    والله عيب عليهم
    بكل شي مستغلينا و لا يحترمونا
    و احنا مدينين لفيفا بسبب دخولها الكويت و الغاء الرسوم علي التصال من الخطوط الارضية
    و هذي كانت ضربه قويه للزين اللي حاولت كذا مره ارجاع هالرسوم

    تحياتي

    ReplyDelete
  11. ويييييه
    لاغي خطي بزين من زمان
    فنانين بالنصب وبخاصة بالمكالمات الدولية

    ReplyDelete
  12. حتى يوصل لي
    تعرف على أصدقاء جدد
    :)
    سخافة باختصار

    وتدري شنو المشكله إن مسجات الدعايات ملوت اللكزس والاصدقاء يوصلون بوقت ابد مو حلو
    وقت النوم أو الراحة وتكون ناسي اتصكر التلفون بعد مشكله



    وقبل يومين علّق ايقو اللي عند بنت خالتي واهي صغيرة والوقت كان الفجر
    دقيت على زين وسألتهم عن رقم puk
    وعطيته باسم منو

    تخيّل قالي خل صاحب العلاقة يتصل
    قلت اهوا نايم بقعدة عشان أبي رقم الايقوا اللي بروحه علّق وبكيفة؟

    قال اي لازم صاحب العلاقة
    قلت اعطيك رقم المدني وتاريخ الميلاد والاسم كامل
    وكل المعلومات

    قال اسف ما يصير ..
    كان ودي اقول #$#$%&
    ههههههههه

    ودقيت بعد نص ساعة وواحد ثاني طلب الاسم كامل ورقم المدني وعطاني الـ puk

    مالت عليهم
    :P

    ReplyDelete
  13. اخوي ريماس.. كيف احوالك؟ من زمان ما دشيت الانترنت واول ما دخلته قلت اسيّر على اصدقائي المدونين

    زين.. جل اهتمامها تلميع صورة الشركة اعلانيا
    بحيث الواحد يتوقع انها من انجح الشركات
    إلا انها الأسوء على الاطلاق


    جرب الوطنية.. هي الارحم نسبيا من فيفا
    فيفا للحين عمرها صغير وتحتاج استراتيجية قوية للمنافسة، وللاسف للحين فيفا تعتبر الأغلى تكلفة
    خل ينزلون تكلفة الرسوم ،، بتلقى الناس كلها صوبها

    بصراحة سووا شي قوي بس ما استمروا فيه
    اللي هو المكالمة في الشبكة نفسها ببلاش
    اذكر انهم خلوها لمدة 3 اشهر.. لو كانوا على الاقل مسوينها سنة.. تلقى كل واحد اخذ خط ووصى ربعه ياخذون فيفا..
    يعني يحتاجون سياسة قوية لجذب المستهلك


    اخيرا، انترنت الوطنية ارحم من زين
    جربه

    ReplyDelete
  14. 21.6
    طل بعينهم لو تقعد فوق ابراج الكويت
    ما يعطيك اكثر من 500 ك.ب
    بس نصب وبوق من الناس

    لا وانا عندي سالفة بعد مع 107
    كل ما ادق يزرعوني بالربع ساعة واكثر والله
    اتصل مثلا وانا بالسيارة بمصافط بيتنا
    ويردون لما اوصل النادي

    وبكيف ابوهم يغيرون السرعات والليمت
    وانا خطي فواتير تصور اسالهم شلون اعرف
    جم لي وجم علي يقولي دق علينا واحنا نقولك
    اقوله ليش انتوا تردون عشان ادق عليكم
    يقول دز مسج حق رقم واهو يقولك جم عندك بس شنو
    بس تقدر تدز 5 مساج بعده ما يطلعلك شي

    اما المسجات الي يدزونها
    مابي اتكلم عن المتاجرة بالدين
    بس ابي اتكلم عن احترام العميل
    ياخي واحد داق عليكم ما يقولكم
    مابي اشترك بخدمة بس يرحم والديكم مابي مسجات
    انا صرت احط تلفوني صامت عشان مسجاتهم
    يقعدوني من النوم عالفاضي

    بس شنقول
    الله كريم يمهل ولا يهمل

    شكراً

    ReplyDelete
  15. صوت الكويت

    و انا لاحقك ان شالله اخوي
    بس ناطر الكل يعرف خطي اليديد و بقطع خط زين

    ReplyDelete
  16. حياتي هدف مو عبث

    المفروض تقترحين على زين يكون شعارهم حياتي عبث مو هدف
    اي ما يدزون مسجات الدعايه الا في اوقات النوم
    و اما سوالف ١٠٧ فحدث و لا حرج
    يبيلنا بلوق كامل بس حق نوادر ١٠٧ و المعاناة اللي من وراهم
    مو شاطرين الا زين تشكر اتصالك يعني خدمة
    و انا مختصر واااايد من معاناتي مع زين

    ReplyDelete
  17. امرأة لا تنسى

    هلا اختي و حياج الله و عودا حميدا
    فعلا انا أأيدج انها الاسوء على الاطلاق
    و الوطنيه انا مجربها و واااايد ارحم منهم
    و يحترمون عملائهم
    و انا اخذت انترنت الوطنيه عقب ما قطعت اليجو و الحمدلله
    ما احتجت ادق علي مركز الخدمه عندهم الا مره وحده من سته اشهر
    مو مثل ١٠٧ كنت كل يوم ادق عليهم
    و في الاخر يوم راجعت المقر الرئيسي قالولي انت مو مقدم شكوى
    قلت عيل اتصالاتي في ١٠٧ شنو ؟
    قالولي هذي مو شكوى
    الشكوي اللي تسجل بالكمبيوتر هني
    حظي

    و فعلا ناطرين فيفا تتحسن
    و تضل الحين الوطنيه افضل الموجود

    ReplyDelete
  18. نمووول

    الله المستعان و حسبي الله و نعم الوكيل
    فعلا الكل يعاني من سوء الخدمه و عدم احترام العميل
    و اللف و الدوران و انعدام المصداقيه

    ReplyDelete
  19. للمرة الرابعة على التوالي يصير بطيئ أدق يقولون طفت ال20 جيجا الي كانت قبل 30 ولا احد قالنا

    الي يغث اني منزل 13 جيجا بس وفي مرة كنت منزل بس 9 جيجا

    شفت البوق اشلون

    وطبعا عمك اصمخ

    انا ابي اقطع اشتراكي بس متردد

    الكل يقولولي فيفا الشبكة مالتهم ضعيفة + كان عندي الوطنية وخدمتهم سيئة وايد يفصل

    ReplyDelete
  20. jako

    جاكو العزيز
    مو بس الداونلود ينحسب عليك
    حتى الابلود و الستريمنج
    كل شي محسوب
    يعني مع ال ٢٠ جيجا حدك اسبوع و تصك العداد
    و تقعد باقي الشهر دافع ٣٠ دينار و سرعتك سرعة الحمام الزاجل

    ما يبيلها كلام اقطع اشتراكك
    واللي اعرفه الوطنيه انها وايد احسن منهم
    و الظاهر كانت عندك مشكله مع الوطنيه
    حاول تخليهم يحلونها
    و فيفا مادري عنها ما جربتها

    ReplyDelete
  21. السلام عليكم
    و الله طلعت أمة محمد كلها تشتكي من هالشركة الشينة !
    أنا غلطة عمري اشتركت ايقو .. اتمنى اقطعها اليوم قبل باجر بس ما يسوا ادفع 50 مادري جم قبل لا ينتهي العقد :@
    بس تخلص ان شاءالله بجدد اشتراكي مع كواليتي نت ..بالنسبة لي احسن شركة لأن جربت فيفا ولازم كل اسبوع يفصل النت و اسوي ريستارت و سوالف و فوق هذا كله ما يفهمون شي بمودم سبيد تش !

    و الله يعينا على هالنصابين .. يا عل كل من يفكر يبوقنا يطيح بحفرة و لا يطلع منها ان شاءالله

    ReplyDelete
  22. Hanan

    الله يعينا و يعينج عليهم
    و حسبي الله على كل نصاب
    طبعا الدي س ل احسن
    لكن اذا محتاجه انترنت نقال جربي الوطنيه
    ارحم من زين بوايد

    ReplyDelete