صيد الكاميرا العربية

انا كنت دايما ضد برامج صيد الكاميرا العربية لانها برامج تستخف بانسانية ضحايا المقالب

اما تستغل حاجتهم في طلب وظيفة او تستفزهم لدرجة الغضب و الهواش في الشوارع او يخوفونهم بطريقة ممكن تسبب الجلطة حق شخص عنده مرض بالقلب او ارتفاع ضغط دم

مرات حتى الصاحي ممكن ينجلط من مواقفهم السخيفة

انا مرة شفت واحد شايب في مصر وقفوه بالشارع اثنين لابسين بدل و يقولونله امن دولة وانت ارهابي الريال قام يبكي وهو يقول والله بريء يا بيه

مادري شنو المضحك في هذي المواقف

اي شخص ممكن يستهبل او يستعبط على اي شخص في الشارع و ينتهي الموقف بهوشة

صيد الكاميرا فن يعتمد على المقالب الخفيفة الطريفة اللي ترسم البسمة على شفاه الضحايا و المشاهدين معا

اما برامجنا فحدث ولا حرج

فاتمنى ان يرحمون الناس من هل المهازل و يرحمونا من سخافاتهم

في الفترة الاخيرة انتشرت عندنا برامج مقالب الفنانين مثل برنامج صادوه اجلكم الله

و انتشرت معاها اشاعات بانها مفبركة

بعد ممثل و مسوين فيه مقلب ما تدري صج خاف او عصب و الا قاعد يمثل تعال فرق

و اليوم شفت هالفيديو في بعض المواقع اللي اتابعها يبين في ظاهره فبركة احد المقالب

للاسف لو كان هالشي صاير في دول تحترم عقل المشاهد كان هالفنان عمره بعد ما يطلع في عمل

الا بعد ما يقدم اعتذار و يدفع ثمن كذبه على جمهوره

لكن عندنا مبدأ غدا الشر و كلام الليل يمحوه النهار و الجماهير ذاكرتهم ضعيفة هو السائد (مو بس عند الفنانين حتى عند اعضاء و مرشحين مجلس الامة) و راح يطلع لنا الاخ الفنان في مسرحية للاطفال في العيد و ينصح الاطفال بالصدق و الامانه

وسامحوني اذا حطيت لكم هالكليب عقب ما حطيت لكم مشهد كاسك يا وطن في الموضوع السابق

والله فرق

وهم ماقول الا خلف الله علينا